مهنة التسويق العقاري ممكن تبان لكتير من الناس إنها مهنة سهلة ومربحة، وناس كتير بيخشوها طمعًا في نجاح سريع ودخل عالي. لكن الحقيقة غير كده خالص، لإنها مهنة مليانة تفاصيل معقدة وتحديات كبيرة محتاجة مهارات وخبرات عشان الواحد يقدر يستمر ويحقق نجاح حقيقي فيها.
– المنافسة شديدة
قد يهمك ايضا
السوق العقاري مليان شركات تسويق ووسطاء كتير بيتنافسوا على نفس العملاء. لو حابب تتميز لازم يكون عندك حاجة مختلفة سواء في العروض اللي بتقدمها أو في طريقة التعامل مع العملاء.
– العميل اولا
العميل مش دايمًا بيكون عارف هو عاوز إيه بالضبط، وكمان كل عميل احتياجاته مختلفة. في ناس بتدور على بيت للعيلة، وناس تانية بتدور على استثمار مربح. دورك كمسوّق عقاري إنك تفهم احتياجات العميل وتقدم له حلول مناسبة بشكل سريع وواضح.
– تفاوض طول الوقت
مرحلة التفاوض من أصعب مراحل الشغل. العميل ممكن يطلب طلبات كتير شروط معينة لاتمام الديل ، والمطور عنده سقف معين . هنا بتظهر مهارة المسوّق في إنه يقنع الطرفين ويحقق معادله مرضية للطرفين.
– ذاكر السوق
السوق العقاري دايمًا في حالة تغيير. الأسعار بتتغير،طرق السداد بتتغير ، العروض شبه اسبوعيه ، اللونشات شبه اسبوعيه .
الوسيط الناجح لازم يكون عارف بكل التطورات دي أول بأول.
– اتعود اشتغل تحت ضغط
التعامل مع أنواع مختلفة من العملاء، خصوصًا المترددين أو اللي عندهم متطلبات كتير، بيكون مرهق نفسيًا. بالإضافة إلى إنك ممكن تتابع عميل لفترة طويلة جدًا ومايردش عليك بعدها او يقفل الديل مع حد تاني ، وده بيزود الضغط عليك.اوعي تحبط او تستسلم ، ارمي ورا ضهرك وابدء من جديد
– الصدق اقصر الطرق لاقناع الناس
العميل اللي بيشتري عقار بيعمل استثمار كبير وبيحتاج يثق في المسوّق اللي بيتعامل معاه. عشان تبني الثقة دي لازم تكون صادق مع العميل، وتكون دايمًا مهتم بمصلحته مش مجرد إنك تقفل ديل وخلاص.
– وقتك كله ملك للشغل
الشغل في التسويق العقاري مافيهوش مواعيد ثابتة. العملاء بيحبوا يشوفوا العقارات في أوقات بعد الشغل أو في الاجازات، وده معناه إنك لازم تكون متاح في أوقات في كل وقت ووقتك ملك الشغل ودي احدي ضرائب المهنه .
– السوق متغير
السوق العقاري بيتأثر بالتغيرات الاقتصادية. ممكن تحصل فترة ركود تخلي الطلب يقل والأسعار تتغير والعكس ممكن يحصل في فترات الانتعاش. لازم تكون قادر تتأقلم مع الظروف دي وتخطط لحلول بديلة.
– طور نفسك باستمرار
ناس كتير بتخش المجال بحماس كبير، لكن مع أول شوية صعوبات بيسيبوها ويمشوا. الناجحين هم اللي بيطوروا نفسهم باستمرار، وبيتعلموا استراتيجيات جديدة وناجحه وايجابيه
– محدش بينجح لواحده
النجاح مش بس معتمد على علاقتك بالعملاء، لكن كمان علاقتك بالمطورين العقاريين، زملاء المهنه . العلاقات دي بتساعدك في إنك تحصل على فرص وعروض كويسة قبل غيرك.
الخلاصة
التسويق العقاري مش سهل زي ما ناس كتير فاكرة. محتاج صبر، اجتهاد، ومهارات متكاملة من أول التعامل مع العملاء و متابعة السوق . النجاح بيجي مع الوقت والمثابرة، ومش أي حد يقدر يستمر فيه لو مش مستعد يبذل المجهود المطلوب.
انت تقرأ هذا الموضوع في قسم عاجل على موقعك المفضل النافذة الاخبارية.
كما يمكنم ايضا تصفح المزيد من الاقسام الهامة في موقعنا:
تابعنا الآن على جوجل نيوز النافذة الإخبارية
